Kaupþing og bankar framlengja aftur lán til JJB Sports

Kaupþing, HBOS og Barclays hafa ákveðið að framlengja lánum sínum til íþróttavörukeðjunnar JJB Sports. Íslenska ríkið er nú einn stærsti hluthafi JJB Sports eftir að Kaupþing leysti til sín tæplega 30% hlut Exista og Chris Ronnie nýlega með veðkalli.

Lánin sem um ræðir nema samtals 60 milljónum punda eða tæplega 10 milljörðum kr.. Þetta er í þriðja sinn sem fyrrgreindir bankar framlengja þessum lánum frá því í desember en JJB Sports þar að greiða rúmlega 166.000 pund eða um 27 milljónir kr. fyrir þetta en framlengingin stendur til 16. mars.

JJB Sports á í miklum erfiðleikum þessa daganna og eru tvö af dótturfélögum þess komin í greiðslustöðvun. Verslunarkeðjan reynir nú að selja heilsuræktarstöðvar sínar, Fitness Club, og eru nokkrir aðilar áhugasamir um kaup á þeim.

Talið er að salan á Fitness Club geti skilað JJB Sports um 50 milljónum punda og þar með gert upp að mestu fyrrgreindar skuldir. Í breska blaðinu Times segir að það sé grundvöllur þess að bankarnir þrír ákváðu að framlengja lánunum.