Calderon hættur sem forseti Real Madrid

Ramon Calderon sagði í dag af sér sem forseti Real Madrid eftir að hann fundaði með stjórn félagsins í dag.

Málið snýst um aðalfund félagsins sem var haldinn í síðasta mánuði. Spænska dagblaðið Marca hefur birt myndir sem gefa til kynna að Calderon hafi staðið að kosningasvindli til að fá ýmis mál í gegn.

Calderon er sakaður um að hafa fengið aðila sem ekki höfðu kosningarétt á aðalfundinum til að greiða atkvæði sér í hag. Calderon hefur neitað þessum ásökunum en Real Madrid hefur boðað til blaðamannafundar í dag þar sem Calderon mun ræða við fjölmiðlamenn.

Það hefur ýmislegt gengið á í stjórnartíð Calderon en áður en hann var kosinn lofaði hann því að hann myndi fá bæði Kaka og Cesc Fabregas til félagsins.