Hann er enginn Kaka - en hann er góður

Gennaro Gattuso, leikmaður AC Milan, segir að enski landsliðsmaðurinn David Beckham hafi komið sér þægilega á óvart síðan hann gekk í raðir liðsins sem lánsmaður fyrir áramót.

Gattuso er sjálfur meiddur en er nokkuð ánægður með framlag Englendingsins til þessa.

"Beckham kom mér þægilega á óvart. Hann er sannur atvinnumaður og mætir alltaf tveimur til þremur tímum of snemma á æfingar. Hann er enginn Kaka, en hann er frábær leikmaður," sagði Gattuso um Beckham, sem er á tveggja og hálfs mánaðar lánssamningi hjá Milan.

"Beckham er að spila mína stöðu á vellinum af því ég er meiddur en við erum gjörólíkir leikmenn. Auðvitað leggur hann upp fleiri mörk en ég, en ég vinn líka fleiri bolta en hann," sagði harðjaxlinn ítalski í samtali við Italia 1.