Dark Knight gæti brotið blað á Óskarnum

Kvikmyndin The Dark Knight gæti brotið blað í sögu Óskarsverðlaunanna því nú telja flestir að hún eigi öruggt sæti meðal þeirra kvikmynda sem tilnefndar verða til Óskarsverðlauna. Í vikunni var tilkynnt að samtök framleiðenda hefðu tilnefnt hana sem bestu kvikmynd ársins. Keppir hún þar við Frost/Nixon, The Curious Case of Benjamin Button og Slumdog Millionaire eftir Danny Boyle. Áður hafði félag leikara í Hollywood tilnefnt Heath Ledger fyrir bestan leik í aukahlutverki.

Þetta gefur til kynna að andlát Heaths Ledger sé kvikmyndagerðarfólki ofarlega í huga og telja fréttaskýrendur að þetta muni hafa mikil áhrif á tilnefningarnar sem kunngerðar verða 22. janúar. Reyndar urðu kvikmyndagagnrýnendur hálf hvumsa þegar tilnefningar til Golden Globe voru kynntar en The Dark Knight hlaut ekki náð fyrir augum þeirrar dómnefndar.

Annars gætu Óskarsverðlaunin orðið um margt merkileg því flestir telja hasarmyndina The Dark Knight sigurstranglega en fast á hæla hennar fylgir teiknimyndin Wall-E sem margir telja að gæti mætt sterk til leiks. Og það yrði nú saga til næsta bæjar ef hasarblaðahetja og teiknimyndafígúra myndu berjast um sigurinn í Kodak-höllinni.