Hleb ánægður hjá Barcelona

Umboðsmaður Aleksander Hleb hjá Barcelona segir að leikmaðurinn sé ánægður hjá félaginu og hann vilji jafnvel vera áfram þó svo að honum standi til boða að fara annað.

Hleb kom til Börsunga frá Arsenal fyrir ári síðan og átti í vandræðum með að vinna sér fast sæti í liðinu á nýliðinni leiktíð. Hann er hins vegar reiðubúinn að berjast fyrir sínu áfram.

„Við höfum fengið fjögur eða fimm tilboð frá liðum í Englandi og Þýskalandi," sagði Uli Ferber, umboðsmaður Hleb, í samtali við spænska fjölmiðla.

„En við höfum fengið að vita að Aleksander er öruggur með sæti í leikmannahóp liðsins á næsta tímabili og hann er ánægður hjá félaginu."