Engin sátt í stjórnarskrárnefnd

Engin sátt náðist milli stjórnarflokkanna og stjórnarandstöðunnar á fundi í stjórnarskrárnefnd alþingis sem var að ljúka. Þinglok eru því enn í uppnámi og óljóst hvenær þinginu lýkur.

Á fundinum voru ýmis sáttatilboð lögð fram á báða bóga. Sjálfstæðisflokkurinn getur ekki fellt sig við auðlindaákvæðið en bauð á fundinum að það yrði umorðað þannig að í stað orðsins þjóðareignar yrði orðið ríkiseign notað. Og jafnframt að ríkisvaldinu væri heimilt að leigja eða úthluta kvóta áfram. Þetta gátu fulltrúar stjórnarflokkana ekki fallist á.

Þá vilja Sjálfstæðismenn að meirihluta upp á tvo-þriðju þurfi fyrir stjórnarskrárbreytingum á alþingi en stjórnarliðar vilja að einfaldur meirihluti ráði. Því náðist ekki sátt um þetta atriði heldur.