Trezeguet ósáttur hjá Juventus

Franski framherjinn David Trezeguet hjá Juventus er ekki í náðinni hjá Claudio Ranieri þjálfara um þessar mundir og umboðsmaður hans segir ekki útilokað að hann fari frá félaginu.

Trezeguet hefur náð sér að fullu eftir hnémeiðsli en hefur ekki fengið fast sæti í liði Juventus eftir að hann kom til baka. Umboðsmaður hans er hundfúll.

"Ég grét í hjarta mínu þegar ég sá hann á bekknum (um helgina). Við erum ekki að tala um eitthvað gamalmenni. Við erum að tala um mann sem hefur orðið heims- og Evrópumeistari og 161 mark hans fyrir Juventus tala sínu máli. Þegar maður giftir sig, er það venjulega fyrir lífstíð, en stundum endar það með skilnaði," sagði umboðsmaðurinn.