Hörkuleikur í Seljaskóla í kvöld

Tólftu umferð Iceland Express deildarinnar í körfubolta lýkur í kvöld með þremur leikjum. Áhugaverð viðureign verður í Seljaskólanum þar sem heitir ÍR-ingar taka á móti stormsveit KR.

KR-ingar hafa unnið alla ellefu leiki sína til þessa í deildinni og geta með sigri náð fjögurra stiga forskoti á Grindvíkinga á toppnum eftir að suðurnesjamenn töpuðu fyrir Stjörnunni í gærkvöld.

ÍR-liðið hefur verið eins og svart og hvítt í vetur, tapaði fyrstu fimm leikjunum í haust en vann svo næstu fimm. ÍR tapaði síðasta leik sínum fyrir jól svo naumlega fyrir Grindavík.

Þessi magnaða viðureign er Iceland Express leikur umferðarinnar sem þýðir að tveimur áhorfendum gefst kostur á að vinna ferð fyrir tvo með Iceland Express.

Aðrir leikir í kvöld eru þeir að Tindastóll tekur á móti Snæfelli á Sauðárkróki og Njarðvík tekur á móti nýliðum FSu.

Allir leikir hefjast klukkan 19:15.