United spilar úrslitaleikinn í hvítu

Leikmenn Manchester United munu klæðast hvítu útivallarbúningunum sínum í úrslitaleiknum gegn Barcelona í Róm þann 27. maí nk. Barcelona telst vera heimaliðið í úrslitaleiknum og klæðist því hinum alþekkta heimabúning sínum.

Heimabúningur United og blái varabúingurinn þykja of líkir Barcelona búningnum og koma því ekki til greina í leiknum.

Síðast þegar liðin mættust í úrslitaleik í Evrópukeppni var Barcelona í útibúningum sínum, en þá hafði United óvænt betur 2-1. Það var í úrslitaleik Evrópukeppni bikarhafa árið 1991.

Barcelona var í heimabúningum sínum þegar liðið vann sigur á Arsenal í úrslitaleik Meistaradeildarinnar árið 2006 í París.