Njarðvík hefði unnið í oddaleik

Óskar Ófeigur Jónsson tók í dag saman skemmtilegan pistil sem birtur var hér á Vísi þar sem borin voru saman lið Njarðvíkur fyrir 20 árum og svo lið KR í dag.

Þessi lið unnu bæði fjórtán leiki í röð og KR-ingar geta í kvöld slegið það met með sigri á Snæfelli í Stykkishólmi.

Friðrik Ingi Rúnarsson framkvæmdastjóri KKÍ var í umræddu Njarðvíkurliði fyrir tveimur áratugum.

Við báðum hann til gamans að bera liðin saman og spá í sigurvegara ef þau hefðu mæst í fimm leikja seríu í úrslitakeppni.

"Þetta eru frekar ólík lið og KR-ingarnir í dag eru hæfileikaríkari, en það sem einkenndi þetta Njarðvíkurlið á þessum tíma var kænska og baráttuandi. Þetta var engu að síður hörku körfuboltalið," sagði Friðrik um Njarðvíkurliðið 1988-89.

"Ég hafði gaman af því að lesa þetta og það er mikill heiður að vera settur sem skotbakvörður á móti Jóni Arnóri Stefánssyni," sagði Friðrik Ingi.

En hefði Friðrik geta hangið í Jóni Arnóri ef liðin hefðu mæst?

"Nei," sagði Friðrik eftir nokkra umhugsun. "Jón er auðvitað íþróttamaður af guðsnáð og hef nú aldrei þótt nein ballerína. Ég var fyrst og fremst góður skotmaður og keppnismaður og það kom mér langt. Jón er auðvitað bæði fljótari og teknískari og betri varnarmaður. Ég hugsa að ég hefði nú ekki komið vel út úr þessari viðureign, nema þá ég hefði geta samið við Jón um að fá vinnufrið í skotunum mínum," sagði Friðrik glettinn, en hann var mikil skytta á sínum tíma.



KR á eftir að sanna sig

En hvort liðið hefði unnið ef þau hefðu mæst í úrslitakeppni.

"Það fer eflaust eftir því hvort þú spyrð Njarðvíkinga eða KR-inga, en eigum við ekki að segja að við Njarðvíkingar hefðum bara unnið í oddaleik. Maður er auðvitað keppnismaður og því verður maður að segja að liðið sem maður var í sjálfur hefði unnið," sagði Friðrik.

Hvar koma þessi tvö lið inn á listann yfir bestu lið á Íslandi síðustu tvo áratugi eða svo?

"Þetta Njarðvíkurlið var ekki það besta sem þaðan hefur komið og til að mynda vann Njarðvíkurliðið veturinn 1994-95, 31 af 32 leikjum sínum. Það lið var gríðarlega sterkt þar sem reynsluboltar og landsliðsmenn voru í bland," sagði Friðrik. Hann segir KR-liðið í dag eiga eftir að sanna sig þó vissulega sé það sterkt á pappírunum.

"KR-liðið er auðvitað gríðarlega sterkt, en það á enn eftir að sanna sig og umrætt Njarðvíkurlið var til að mynda ekki Íslandsmeistari þarna um árið. Ef KR-liðinu tekst að vinna eitthvað af þeim titlum sem eru í boði í vetur og vor er örugglega óhætt að ætla að það sé eitt af þeim allra bestu sem sett hafa verið saman hér á landi," sagði Friðrik.