Montgomerie leitar ráða hjá Ferguson

Skoski kylfingurinn Colin Montgomerie, nýskipaður fyrirliði Evrópuliðsins í Ryder-bikarnum, hyggst fá ráðleggingar frá Sir Alex Ferguson, knattspyrnustjóra Manchester United.

Sam Torrance var fyrirliði Evrópuliðsins árið 2002 en hann leiddi þá liðið til sigurs eftir að hafa fengið ráðleggingar frá Ferguson.

„Mér fannst Torrance frábær fyrirliði og ber mikla virðingu fyrir honum. Ég er alltaf til í að læra af öðrum og því ekki að fá ráðleggingar frá þeim bestu? Ég vil gera allt sem ég get til að við vinnum," sagði Montgomerie.

„Sir Alex er fæddur sigurvegari og er manna bestur í að fá það besta út úr sínu liði. Hann ætti því að geta gefið mér góð ráð," sagði Montgomerie en í fyrra stýrði Ferguson United til Englands-, Evrópu og Heimsmeistaratitils félagsliða.