Fer Reyes næst til Roma?

Hinn víðförli knattspyrnumaður Jose Antonio Reyes hefur hugsanlega enn ein vistaskiptin í sumar en hann er orðaður við Roma þessa dagana.

Reyes hefur leikið með Arsenal, Sevilla, Real Madrid, Atletico Madrid og er núna hjá Benfica. Hann er aðeins 25 ára gamall og stoppar því stutt á hverjum stað.

Þessi spænski framherji hefur ekki staðið undir væntingum síðustu ár og var í láni hjá Benfica frá Atletico sem ætlar að losa sig við hann í sumar.

Roma reyndi að fá hann í fyrra en hafði ekki erindi sem erfiði. Það er auðsóttara að fá hann í dag.