Árni Gautur eini Íslendingurinn með bros á vör

Árni Gautur Arason og félagar í Odd Grenland unnu 5-1 stórsigur á Brann í átta liða úrslitum norsku bikarkeppninnar í kvöld. Fimm íslendingar tóku þátt í leiknum en Árni Gautur var sá eini sem fagnaði sigri.

Birkir Már Sævarsson, Kristján örn Sigurðsson og Ólafur Örn Bjarnason voru allir í byrjunarliði Brann og þá kom Ármann Smári Björnsson inn á sem varamaður á 75. mínútu. Ólafur skaut í slánna úr vítaspyrnu á 79. mínútu en Ármann Smári fiskaði vítið.

Árni Gautur Arason stóð sig vel í marki Odd Grenland en eina markið sem hann fékk á sig kom eftir hornspyrnu. Árni Gautur var tæpur fyrir leikinn en harkaði af sér og kláraði hann.