Arnór Guðjohnsen og Ásgeir Sigurvinsson mæta golfdrottningum

Lokamót Bleika Toppbikarsins fer fram í Borgarnesi á morgun en þessi golfmótaröð er haldin til styrktar Krabbameinsfélaginu og styrkt af Vífilfelli. Í lok mótsins mætast tvö lið í einvígi, Arnór Gudjohnsen og Helena Árnadóttir gegn Ásgeiri Sigurvinssyni og Ragnhildi Sigurðardóttur.

Í sumar er Bleiki Toppbikarinn haldinn fimmta árið í röð en það eru Krabbameinsfélag Íslands og Vífilfell sem standa fyrir mótaröðinni í samvinnu við Golfsamband Íslands. Allur ágóði verður nýttur til eflingar leitarstarfs á vegum Krabbameinsfélagsins. Sjö golfklúbbar hafa lagt sitt af mörkum í sumar til að gera Bleika Toppbikarinn jafn veglegan og skemmtilegan og raun ber vitni.

„Fyrsta mótið var haldið þann 12. júní á Akureyri, en fyrirkomulagið í mótaröðinni er Texas Scramble. Góð þátttaka hefur verið í mótinu, og óhætt að segja að mikil stemming hafi verið fyrir því um allt land. Lokamótið fer fram hjá Golfklúbbi Borgarness, en sigurvegarar hvers móts hafa unnið þátttökurétt í lokamótinu, auk þess sem að eitt par var dregið út í hverju móti og fær það einnig þátttökurétt," sagði Gústaf Gústafsson, markaðsstjóri Krabbameinsfélagsins, í fréttatilkynningu.

Lokamótinu líkur eins og áður sagði með einvígi tveggja liða þar sem Ragnhildur Sigurðardóttir fyrrverandi Íslandsmeistari í golfi og Ásgeir Sigurvinsson fyrrverandi landsliðsmaðurí knattspyrnu mæta Helenu Árnadóttur fyrrverandi Íslandsmeistara í golfi og Arnóri Gudjohnsen fyrrverandi landsliðsmanni í knattspyrnu.

Markmið einvígisins er að vekja athygli á mikilvægi baráttunnar gegn brjóstakrabbameini en einnig munum við bjóða fyrirtækjum að heita á sigurliðið og rennur áheitið til styrktar átakinu.