Ronaldinho: Ég ætla ekki að hætta

Brasilíumaðurinn Ronaldinho segir ekkert hæft í þeim fregnum að hann sé reiðubúinn að leggja skóna á hilluna.

Spænska dagblaðið Sport fullyrti þetta á sunnudaginn en Ronaldinho sagði þetta alrangt.

„Ég hef aldrei íhugað að hætta," sagði hann á heimasíðu sinni. „Ég er mjög ánægður hjá AC Milan."

Ronaldinho gagnrýndi dagblaðið harkalega og sagði að það hefði áður ekki hikað við að birta rangar fréttir um sig þegar hann var leikmaður hjá Barcelona.

„Ég get fullvissað alla um að ég muni virða minn samning við AC Milan sem rennur út árið 2011," sagði Ronaldinho.