Ancelotti: Mikilvægt að komast áfram

Carlo Ancelotti, stjóri Chelsea, var ánægður með að vera kominn áfram í Meistaradeildinni og hann var einnig afar sáttur við endurkomu Didier Drogba.

„Ég er glaður því við erum komnir áfram. Það er mikilvægt. Þetta var erfiður leikur og fín úrslit því Atletico spilaði vel í kvöld," sagði Ancelotti eftir 2-2 jafnteflið á Spáni.

„Didier er afar mikilvægur maður í þessu liði. Það eru margir mikilvægir leikmenn í liðinu en hann er að standa sig vel og við gleðjumst yfir því."

Chelsea og Man. Utd komust bæði áfram og geta því leyft sér að hugsa um leikinn á sunnudag er þau mætast á Stamford Bridge.

„Leikmenn voru ekki að hugsa um þann leik í kvöld," sagði Ancelotti en Drogba viðurkenndi samt að hafa verið með þann leik á bak við eyrað er hann spilaði í kvöld. Það stöðvaði hann ekki í því að skora tvisvar.