Mourinho ætlar að gera allt til að fá Carvalho til Inter

Jose Mourinho er vongóður um að hann geti fengið landa sinn Ricardo Carvalho til að koma til ítalska liðsins frá Chelsea. Mourinho fékk Carvalho á sínum tíma frá Porto til Chelsea.

Carvalho neitaði í gær öllum sögusögnum um að hann væri á förum frá enska úrvalsdeildarliðinu en Mourinho er ekki búinn að gefast upp.

„Carvalho er einn af bestu miðvörðum í heimi," sagði Mourinho í viðtali við La Gazzetta dello Sport. „Það var ómögulegt að fá hann til að koma í fyrrasumar en nú tel ég að það sé möguleiki," bætti Mourinho við.

Mourinho gerði Inter að ítölskum meisturum á sínu fyrsta tímabili alveg eins og hann afrekaði með Porto í heimalandinu Portúgal og með Chelsea á Englandi.

Mourinho talaði einnig um að Inter væri áhugasamt á að næla í 20 ára kantmann hollenska liðsins Twente Enschede en sá heitir Marko Arnautovic og er Austurríkismaður.