Enginn Jón Arnór eða Helgi með KR gegn Blikum

KR-ingar leika í kvöld án þeirra Jóns Arnórs Stefánssonar og Helga Más Magnússonar þegar topplið Iceland Express deildar karla tekur á móti Blikum í DHL-Höllinni. Jón Arnór og Helgi Már eiga báðir við meiðsli að stríða og geta því ekki verið með í leiknum.

KR getur í kvöld jafnað metið yfir flesta sigurleiki í röð frá upphafi tímabils en þeir hafa unnið 13 fyrstu deildarleiki sína. KR hefur auk þess unnið alla 23 leiki tímabilsins í öllum keppnum, deild (13), fyrirtækjabikar (4), Reykjavíkurmóti (3) og bikarkeppni (3).

KR vann fyrri leik sinn gegn Breiðabliki með 36 stiga mun í Smáranum, 72-108 en staðan var þá 30-67 í hálfleik. Þeir Jón Arnór og Helgi Már léku aðeins í samtals 26 mínútur í þeim leik. Jón Arnór var með 7 stig á 15 mínútum og Helgi Már var með 7 stig, 4 fráköst og 4 stoðsendingar á 11 mínútum.