Ástralir fjölmenna til að fylgjast með Tiger

Aðalmálið í Ástralíu í dag er Tiger Woods. Besti kylfingur heims er kominn til landsins í fyrsta sinn síðan 1998 og ótrúlegur fjöldi áhorfenda mætti til þess að horfa á Tiger æfa.

Mikið hefur verið gert úr því hversu mikið Tiger fær borgað fyrir að taka þátt í mótinu en mótshaldarar greiða honum 3 milljónir punda.

Woods segir þó að það séu ekki bara peningarnir sem hafi dregið hann til Ástralíu.

„Það eru mörg golfmót um allan heim og ég hef bara ekki komist hingað lengi. Maður fær ekki tækifæri á hverjum degi til að taka þátt í svona móti og það er virkilega gaman að sjá þennan völl," sagði Tiger og bætti við að sem betur fer væri það ekki daglegt brauð að slíkur fjöldi áhorfenda fylgdist með sér æfa.