Birgir Leifur í vandræðum á sömu holum og í gær

Atvinnukylfingurinn Birgir Leifur Hafþórsson spilaði á fimm höggum yfir pari á þriðja degi opna portúgalska mótinu í dag en mótið er hluti af evrópsku mótaröðinni.

Birgir Leifur er eins og er í 70. sæti á mótinu en hann er búinn að leika 52 holur á 220 höggum eða sjö höggum yfir pari.

Birgir Leifur fékk sjö skolla, níu pör og tvo fugla á hringnum í dag. Hann var að fá skolla á sömu holum og í gær en hann fékk fimm skolla á holum 4 til 9 en var með fimm skolla í röð á holum 5 til 9 í gær.

Birgir Leifur lék frábærlega á fyrsta degi mótsins þegar hann lék á 69 höggum og náði síðan tveimur fuglum á síðustu fjórum holunum á öðrum deginum sem komu honum í gegnum niðurskurðinn. Fram að því hafði Birgir Leifur tapað sex höggum og nánast spilað sig út úr mótinu.