Kristín Clausen: Gekk allt upp í síðari hálfleik

„Við fórum inn í hálfleik og ætluðum að bæta okkar leik enda ekki nógu grimmar á flestum sviðum í fyrri hálfleik," sagði Kristín Clausen, fyrirliði Stjörnunnar, um það hvað hefði breyst í hálfleik hjá þeim.

„Það vantaði smá upp á og það kom allt í síðari hálfleik. Fengum vörn, markvörslu og hraðaupphlaup og þá var þetta aldrei spurning. Það gekk allt upp í síðari hálfleik."

Kristín er ekki óvön því að lyfta bikurum fyrir Stjörnuna en segist aldrei fá leið á því.

„Þetta er alltaf jafn gaman. Ég mun aldrei venjast þessu. Það er alltaf eins og maður sé að gera þetta í fyrsta skipti," sagði Kristín brosmild.