Gabriel Heinze: Ekki á leiðinni aftur til Englands

Gabriel Heinze er ánægður í herbúðum Real Madrid þrátt fyrir fjölmiðlamenn keppist við að skrifa um hugsanlega félagsskipti þessa baráttuglaða Argentínumanns í sumar.

Heinze kom til Real Madrid frá Manchester United sumarið 2007 en Heinze segir að hann sé ekki á leiðinni aftur í ensku úrvalsdeildina. Það er vitað af áhuga hjá liðum eins og Chelsea, Manchester City og Tottenham.

Samningur Heinze og Real Madrid er til ársins 2010 og hann vonast til að halda áfram að spila á Bernabeu þótt að hann viðurkenni að framtíð hans sé óráðin.

„Ég er rólegur yfir þessu. Ég hef séð að menn hafa verið að orða mig við einhver félög en ég hef ekki talað við neinn. Ég er með saming við Real og er ánægður hér," sagði Heinze í viðtali við vefsíðu Skysports.