Stjarnan segir upp samningi Sovic

Stjórn körfuknattleiksdeildar Stjörnunnar hefur tekið þá ákvörðun að rifta samningi við Nemanja Sovic. Frá þessu er greint á heimasíðu félagsins.

Sovic gekk í raðir Garðabæjarliðsins frá Breiðabliki í sumar.

„Þessi ákvörðun var ekki auðveld enda Nem drengur góður og góður leikmaður. En eins og mikið hefur verið rætt um í körfuboltaheiminum verða lið að passa að lenda ekki í vanda með rekstur sinn og það þótti nauðsynlegt að skera niður kostnað. Aðhald verður á öllum öðrum vígstöðvum í rekstri félagsins í vetur og ekki þarf að orðlengja mikið ástæður þessa enda þær öllum ljósar," segir á heimasíðu Stjörnunnar.