McDowell kominn í forystu í Suður-Kóreu

Norður-Írinn Graeme McDowell er með forystu þegar tveimur fyrstu keppnisdögunum er svo gott sem lokið á Ballantine-meistaramótinu í Suður-Kóreu.

Reyndar náðu ekki allir kylfingar að klára sína hringi þar sem tveggja og hálfs tíma seinkun var á því að keppni gæti hafist vegna mikilla vinda. Af þeim söku skall myrkrið á áður en allir voru búnir með hringinn sinn.

Þeir kylfingar sem eru í níu efstu sætunum á mótinu náðu þó allir að klára sinn hring. Þar fer McDowell fremstur í flokki enda lék hann frábært golf í dag, á 64 höggum og er samtals á tólf höggum undir pari.

Hann hefur tveggja högga forystu á Svíann Johan Edforws og Indverjann Jeev Milkha Singh, þrátt fyrir að hafa leikið síðustu tvær holurnar í miklu myrkri.

Forystumennirnir eftir fyrsta hringinn náðu sér ekki á strik í dag. Mikko Ilonen frá Finnlandi var á einu höggi yfir pari þegar hann þurfti að hætta eftir ellefu holur en Ástralinn Tony Carolan náði að klára og lék á 75 höggum og er samtals á tveimur höggum undir pari.

Af þekktari kylfingum mótsins má nefna að Thomas Björn frá Danmörku, Padraig Harrington frá Írlandi og Kim Anthony frá Bandaríkjunum eru í 6.-8. sæti á átta höggum undir pari.

Bandaríkjamaðurinn Chris DiMarco er svo í 10.-15. sæti á sex höggum undir pari og heimamaðurinn KJ Choi er í 19.-29. sæti á fjórum höggum undir pari.

Allir náðu þeir að klára sína hringi í dag.