Getafe leggur bölvun á þjálfara

Það er nokkuð áhugavert að skoða hvað orðið hefur um þjálfara andstæðinga spænska liðsins Getafe á þessari leiktíð, ekki síst þegar kemur að andstæðingum liðsins í Evrópukeppninni.

Þjálfarar fimm af sex þeirra liða sem mætt hafa Getafe í Uefa keppninni í vetur hafa þannig verið reknir í kring um leiki við Getafe.

Lærisveinar Michael Laudrup mæta Benfica í síðari leik liðanna í 16-liða úrslitum keppninnar í kvöld og ef Getafe fer áfram úr þeirri viðureign væri þjálfara næstu mótherja liðsins líklega hollara að vera var um sig.

Tottenham spilaði í riðli með Getafe í riðlakeppninni og þar þurfti Martin Jol að taka pokann sinn eftir 2-1 tap fyrir spænska liðinu. Þjálfari Hapoel Tel Aviv, Guy Luzon, sagði af sér fjórum dögum fyrir leik liðsins gegn Getafe og Anderlecht skipti einnig um þjálfara í milliriðlunum rétt áður en það mætti Getafe.

AEK frá Aþenu rak þjálfara sinn Llorenc Serra Ferrer aðeins sólarhring fyrir leik gegn Getafe og nú síðast sagði Antonio Camacho af sér hjá Benfica eftir að hafa tapað fyrri leiknum gegn Getafe í 16-liða úrslitunum.

Ekki nóg með þetta heldur rak Real Murcia í spænsku deildinni svo þjálfara sinn á dögunum eftir 3-0 tap gegn Getafe.

"Mér finnst það oft á tíðum ekkert sérstaklega góð hugmynd þegar lið eru að skipta um þjálfara, en það hefur sannarlega gerst oft í kring um leiki við okkur í vetur," sagði Laudrup á heimasíðu Getafe. "Það hefur hins vegar reynst okkur ágætlega að mæta liðum í þessari stöðu svo mér er alveg sama þó það haldi áfram að gerast," sagði Daninn.