Ómögulegt að bera sig saman við Tiger

Charles Howell hefur titil að verja á opna Northern Trust-mótinu sem hófst í dag í Bandaríkjunum en mótið er liður í PGA-mótaröðinni.

Sýnt verður beint frá keppni á lokadegi mótsins á sunnudaginn en um er að ræða gríðarlega sterkt mót þar sem átta af tíu bestu kylfingum heimsins í dag keppa. Þeir sem eru fjarverandi eru Tiger Woods og Ernie Els.

Howell er 28 ára gamall og fagnaði sigri á mótinu í fyrra eftir að hafa lagt Phil Mickelson í bráðabana. Flestir spekingar reikna þó með því að Adam Scott og Mike Weir verði í titilbaráttunni í ár en þó skal ekki afskrifa Howell sem hefur yfirleitt verið meðal efstu manna undanfarin ár.

Hann ræddi um það hvernig það hefur verið fyrir unga kylfinga að hefja feril sinn í golfheiminum. Vandamálið er ekki slæmt gengi heldur að allir ungir og efnilegir kylfingar eru sjálfkrafa bornir saman við Tiger Woods.

„Það hefur ekkert ræst úr Sergio Garcia," sagði hann í kaldhæðnistón. „Hann hefur átt frábæru gengi að fagna á sínum ferli en í augum margra hefur honum mistekist að láta eitthvað verða úr sér vegna þess að hann hefur ekki unnið eitt stórmótanna. Hann ætti því bara að hætta þessu," sagði Howell.

Sjálfur hefur Howell unnið tvö mót á ferlinum og bliknar auðvitað í samanburði við Tiger. En ef þeim samanburði er sleppt hefur Howell átt fínasta feril. Hann var á sínum tíma kostinn nýliði ársins á PGA-mótaröðinni og verið tvívegis valinn í keppnislið Bandaríkjanna í Forsetabikarnum.

„Tiger hefur sett viðmiðið allt of hátt. Margir ungir kylfingar verða einfaldlega að bíða þolinmóðir þar sem það er mjög algengt að menn toppi á sínum ferli á fertugsaldrinum."

Við þetta má svo bæta að þegar Tiger varð þrítugur hafði hann unnið 54 mót á heimsvísu og tíu stórmót, þar af öll fjögur að minnst tvisvar.