Tap Ford minnkar milli ára

Bandaríski bílaframleiðandinn Ford tapaði 2,7 milljörðum dala, jafnvirði 178,6 milljörðum íslenskra króna, á síðasta ári. Þrátt fyrir tapið er þetta talsverður bati frá þarsíðasta ári þegar fyrirtækið tapaði 12,6 milljörðum dala.

Þar af nemur tapið á fjórða og síðasta ársifjórðungi 2,8 milljörðum dala. Það er á pari við væntingar markaðsaðila ef einskiptikostnaður er undanskilinn.

Þetta jafngildir því að tap á hlut nam 1,35 dölum á öllu síðasta ári samanborið við 6,72 dala tap árið á undan.

Tekjur námu 172,5 milljörðum dala samanborið við 160,1 milljarð í hitteðfyrra. Tekjurnar á fjórða ársfjórðungi námu 44,1 milljarði dala en 40,3 milljörðum dala í hitteðfyrra.

Alan Mulally, forstjóri Ford, sagði að þrátt fyrir minni sölu á bílum fyrirtækisins í Bandaríkjunum í fyrra þá væri reksturinn góður. Útlitið fyrir þetta ár er hins vegar ekki gott, að hans sögn.