Birgir Leifur líklega í gegnum niðurskurðinn

Birgir Leifur Hafþórsson lék öðru sinni á pari á opna spænska meistaramótinu í golfi. Hann kemst líklega í gegnum niðurskurðinn en það kemur endanlega í ljós þegar allir kylfingar dagsins hafi lokið keppni.

Hann lék á 72 höggum, rétt eins og á fyrsta keppnisdeginum í gær, og er sem stendur í 64.-83. sæti. Sem stendur er því spáð að þeir kylfingar sem eru á einu höggi yfir pari komist ekki í gegnum niðurskurðinn.

Birgir Leifur lék tólf holur á pari í dag, fékk þrjá fugla og þrjá skolla. Hann náði tveimur fuglum í röð á þrettándu og fjórtándu holu en fékk svo skolla á fimmtándu. Hann paraði svo síðustu þrjár holurnar.

Meðal þekktra kylfinga á mótinu má nefna Bandaríkjamanninn John Daly sem lék á 70 höggum í dag en er samtals á einu höggi yfir pari. Það eru því sáralitlar líkur á því að hann komist í gegnum niðurskurðinn.

Heimamaðurinn Miguel Angel Jimenez er í góðum málum á sjö höggum undir pari en hann lék á 67 höggum í dag. Hann er sem stendur í 5.-7. sæti.

Skotinn Colin Montgomerie lék á pari í dag og er á tveimur höggum undir pari í 41.-53. sæti.

Spánverjinn Ignacio Garrido hefur forystu en hann lék á níu höggum undir pari í dag og er á samtals fimmtán höggum undir pari. Hann hefur fimm högga forystu á Svíann Martin Erlandsson sem hefur þó aðeins lokið níu holum í dag.