Björgun Citigroup hífir markaði upp

Gengi hlutabréfa í asískum og evrópskum fjármálafyrirtækjum hefur hækkað hressilega í dag. Ástæðan ákvörðun bandaríksku ríkisstjórnarinnar að koma þarlenda bankanum Citigroup til aðstoðar með kaupum á forgangshlutabréfum hans fyrir 20 milljarða dollara og öðrum aðgerðum sem stuðla eiga að því að skera niður kostnað í rekstri hans.

Bloomberg-fréttaveitan hefur eftir Roger Kunz, framkvæmdastjóra hjá svissneska fjárfestingabankanum Clariden Leu AG, að björgunaraðgerðirnar væru bráðnauðsynlegar, Citigroup væri of stór og mikilvægur banki til að fara í þrot.

Gengi hlutabréfa í Deutsche bank, umsvifamesta fjármálafyrirtæki Þýskalands, rauk upp um 3,7 prósent í morgunsárið og í Credit Suisse um 3,9 prósent. Önnur fjármálafyrirtæki stukku upp með svipuðum hætti víða annars staðar í álfunni.

Helstu hlutabréfavísitölur ruku upp um á bilinu fimm til sex prósent á föstudag eftir afar dræma viku. Þá hækkaði Nikkei-vísitalan í Japan í dag um 2,7 prósent.

FTSE-vísitalan í Bretlandi hefur nú hækkað um 3,8 prósent. Dax-vísitalan í Þýskalandi fór upp um 2,59 prósent og CAC-40 vísitalan í Frakklandi um 3,57 prósent. Talsverð hækkun er sömuleiðis á norrænum hlutabréfamörkuðum en samnorræna hlutabréfavísitalan OMX-40 hefur hækkað um 3,37 prósent í dag.