Zlatan skoraði tvö í sigri Inter

Sænski framherjinn Zlatan Ibrahimovic skoraði tvívegis í kvöld þegar lið hans Inter skaust á toppinn í ítölsku A-deildinni með 4-0 sigri á Roma.

Victor Obinna og Dejan Stankovic voru einnig á skotskónum fyrir lærisveina Jose Mourinho, sem hafa tveggja stiga forystu á toppi deildarinnar. Fyrirliðinn Francesco Totti lék sinn fyrsta leik fyrir Roma á leiktíðinni, en kom ekki í veg fyrir fjórða tap Rómverja í síðustu sjö leikjum í deildinni.

Þrjú lið eru jöfn að stigum í öðru sæti deildarinnar - Catania sem lagði Palermo 2-0 í grannaslag á Sikiley, Udinese sem gerði 2-2 jafntefli við Lecce og svo Napoli sem lagði Juventus 2-1 í gær.

AC Milan er þar stigi á eftir eftir 3-0 sigur á Sampdoria þar sem Ronaldinho (2) og Filippo Inzaghi skoruðu mörk Milan.