Maradona vill Mascherano sem fyrirliða

Diego Maradona var í kvöld opinberlega kynntur sem nýr þjálfari landsliðs Argentínu. Carlos Bilardo, sem var þjálfari þegar Maradona lyfti heimsmeistarabikarnum 1986, verður aðstoðarmaður hans.

Maradona opinberaði það á blaðamannafundinum í kvöld að hann vill gera Javier Mascherano, miðjumann Liverpool, að fyrirliða Argentínu. Javier Zanetti hefur verið fyrirliði liðsins.

„Ég vil að Mascherano verði fyrirliði því hann gefur sig alltaf allan í leikina. Þannig menn vil ég að klæðist búningi Argentínu. Þá er hann mjög náinn samherjum sínum," sagði Maradona.