Svanasöngur Coulthards í úrslitamótinu

Þó mest athygli sé á titilslag Lewis Hamilton og Felipe Massa í Formúlu 1 mótinu í Brasilíu í dag, þá fær Skotinn David Coulthard sinn skerf af athygli. Hann ekur í sínu síðasta Formúlu 1 móti eftir fjórtán ár í íþróttinni.

Coulthard hefur á ferlinum ekið með Wiliams, McLaren og Red Bull. Hann hefur alltaf þótt góður fulltrúi íþróttarinnar og hefur unnið 13 mót.

"Jafnvel þegar illa hefur gengið, þá hef ég notið þess að keppa í þeim 247 mótum sem ég hef ekið í. Ég hef unnið sæta sigra og upplifað gleði og sorg", sagði Coulthard. Hann kom inn í lið Williams eftir Ayrton Senna frá Brasilíu lést á Imola brautinni 1994.

Mikil spenna er fyrir lokamótið í dag og Lewis Hamilton og Felipe Massa berjast um titilinn. Massa er fremstur á ráslínu, en Hamilton er í fjórða sæti og verður að vera í fimmta sæti eða ofar, ef Massa vinnur til að hampa titlinum.

Bein útsending er frá mótinu á Stöð 2 Sport kl. 16.00 og verður m.a. fjalllað sérstaklega um feril Coulthards í upphitun, auk þess sem farið verður yfir ýmis atvik á árinu.