AP fréttastofan greinir frá því að fyrstu athuganir á olíuborpöllum í Mexíkólfóa sýni að fellibylurinn Ike virðist hafa eyðilagt minnst tíu borpalla og nokkrar gas- og olíuleiðslur. Ekki er enn ljóst hversu miklar skemmdir urðu á öðrum borpöllum, en alls eru um 3800 olíuborpallar í Mexíkóflóa, þar af 717 sem eru fullmannaðir.
Eyðileggingin virðist þó hugsanlega minni en af völdum fellibyljanna Katarína og Rita, en samkvæmt upplýsingum bandarískra stjórnvalda eyðilögðu þeir fellibylir samtals 108 olíuborpalla.
Enn er óvíst hverjar afleiðingar fellibylsins verða á olíuverð, en þegar fellibylurinn Gustav nálgaðist Mexíkóflóa var öll olíu og gasframleiðsla í flóanum stöðvuð, og hefur að mestu legið niðri síðan. Fjöldi olíuhreinsistöðva í Texas hafa sömu leiðis verið lokaðar vegna óveðursins, og almenningur var varaður við því að bensínskortur gæti gert vart við sig næstu daga.
Fyrir helgi fór bensínverð í sumum hlutum Bandaríkjanna í 5 dollara gallonið, sem svarar til 120 krónum líterinn.
