Bandarískir fjárfestar skelfingu lostnir

Björgunaraðgerðir bandarískra stjórnvalda á bandaríska tryggingarisanum AIG olli miklum taugatitringi í röðum fjárfesta þar í landi í dag. Óttast þeir að fjöldi fjármálafyrirtækja standi illa og muni falla undir gjaldþrotahamarinn á næstunni. Ótti þeirra leiddi til þess að fjárfestar losuðu mikið af stöðum sínum í bandarískum fjármálafyrirtækjum og leituðu skjóls í varanlegri eignum, svo sem í skuldabréfum og gulli. Björgunaraðgerðir stjórnvalda fólust í því að hið opinbera lánar tryggingarisanum 85 milljarða dala, jafnvirði átta þúsund milljarða íslenskra króna, til næstu tveggja ára svo það geti mætti skuldbindingum sínum. Við þetta eignast ríkið tæpan áttatíu prósenta hlut í fyrirtækinu. Staða fyrirtækisins þykir af slæm en gjaldþrot þess hefði haft margfalt víðtækari afleiðingar í för með sér en gjaldþrot bandaríska fjárfestingabankans Lehman Brothers myndi nokkurn tíma hafa. Að því er Associated Press-fréttastofan hefur eftir sérfræðingum vestanhafs í dag eru fjárfestar skelfingu lostnir um horfur í efnahagslífinu, ekki síst af ótta við að fleiri fjármálafyrirtæki fari undir græna torfu. Dow Jones-hlutabréfavísitalan féll um heil fjögur prósent og liggur nú í rúmum 10.600 stigum og hefur ekki verið lægri síðan seint í nóvember árið 2005. Nasdaq-vísitalan 4,6 prósent á sama tíma. Nasdaq-vísitalan liggur í rétt tæpum 2.100 stigum. Hún hefur ekki legið undir 2.000 stigunum síðan snemma í maí árið 2005.