Carragher: Gott kvöld fyrir Liverpool

Liverpool tryggði sér toppsæti D-riðils með sigri á PSV Eindhoven í kvöld. Jamie Carragher, varnarmaður Liverpool, segir að kvöldið hafi verið frábært fyrir félagið.

„Við komum í þennan leik með það markmið að vinna riðilinn og það tókst. Þetta var frábært kvöld fyrir okkur. Við náðum réttum úrslitum, gátum hvílt nokkra leikmenn, ungir leikmenn eins og Lucas og David Ngog léku vel og svo fengu þrír leikmenn úr unglingaliðinu að spila. Það gleður alla hjá félaginu," sagði Carragher.

„Þetta var ekki léttur leikur því þeir voru að berjast fyrir áframhaldandi veru í Evrópukeppnum. En við vorum staðráðnir í að ná toppsætinu og áttum það skilið eftir frammistöðuna í seinni hálfleik. Það gerðist ekki mikið í þeim fyrri en réðum ferðinni eftir hálfleik."