65 stig Martin skutu KR á toppinn

KR er komið á toppinn í Iceland Express deild kvenna í körfubolta eftir að liðið skellti Keflavík 90-81 í kvöld. Monique Martin fór hamförum í liði KR og skoraði 65 stig í leiknum.

Martin nýtti 24 af 37 skotum sínum og 12 af 13 vítum en hún hitti úr 7 af 10 þriggja stiga skotum sínum. TaKesha Watson skoraði 27 stig og gaf 11 stoðsendingar hjá Keflavík.

KR hefur hlotið 18 stig líkt og Keflavík en er á toppnum vegna betri árangurs í innbyrðisviðureignum liðanna. Nánari umfjöllun um leikinn kemur hér á Vísi í fyrramálið.

Grindavík lagði Íslandsmeistara Hauka 99-80 á Ásvöllum þar sem Tiffany Roberson skoraði 32 stig og hirti 9 fráköst fyrir Grindavík og Jovana Stefánsdóttir skoraði 23 stig. Kiera Hardy skoraði 37 stig fyrir Hauka og Kristrún Sigurjónsdóttir skoraði 23 stig.

Þá vann Valur sigur á Hamri í Hveragerði 68-63.