Gengi Google aldrei hærra

Gengi hlutabréfa í netleitarrisanum Google fór yfir 700 dali á hlut í dag en þetta mun vera í fyrsta sinn síðan fyrirtækið var skráð á hlutabréfamarkað um mitt ár 2004 sem gengið hefur farið svo hátt.

Hæst fór gengið í 704 dali á hlut eftir að viðskipti hófust á fjármálamörkuðum vestanhafs í dag.

Google var skráð á hlutabréfamarkað um mitt ár 2004 og stóð gengið á fyrsta degi í 85 dölum á hlut. Þetta jafngildir því að gengi bréfa í fyrirtækinu hafi rúmlega áttfaldast í verði á þremur árum.