Hráolíuverð í methæðum

Heimsmarkaðsverð á hráolíu skaust í hæstu hæðir síðdegis í dag eftir að nýbirtar tölur orkumálaráðaneytis Bandaríkjanna sýndu fram á að olíubirgðir í landinu hafi dregist meira saman en gert var ráð fyrir. Verðið stendur í rúmum 80 dölum á tunnu og hefur aldrei verið hærra.

Mjög dró úr olíubirgðum í Bandaríkjunum í sumar vegna mikillar eftirspurnar eftir olíu til húshitunar og eldsneyti. Greinendur hafa hverja vikuna á fætur annarri vonað að eftirspurnin myndi minnka eftir því sem liði hefur á haustið. Þeim hefur hins vegar ekki orðið að ósk sinni.

Samkvæmt tölunum nú drógust olíubirgðirnar saman um rétt rúmar sjö milljónir tunna frá síðustu viku en það er talsvert meira en greinendur höfðu gert ráð fyrir.

Olíuverðið hefur hækkað talsvert síðustu daga. Horft var til þess að ákvörðun OPEC-ríkjanna, samtaka olíuútflutningsríkja, um aukinn framleiðslukvóta, myndi leiða til verðlækkunar líkt og stefnt var að, en það hefur ekki gengið eftir.