Bandarísk einkaneysla jókst umfram spár

Einkaneysla í Bandaríkjunum jókst um 0,4 prósent á milli mánaða í júlí samanborið við 0,2 prósent í mánuðinum á undan. Þetta er nokkru yfir væntingum. Á sama tíma benda tölur viðskiptaráðuneytis Bandaríkjanna til þess að verðbólga hafi hjaðnað. Greinendur segja greinilegt að bandarískt efnahagslíf hafi verið í hröðum vexti þegar samdráttur varð á bandarískum fasteignalánamarkaði í seinni hluta júlí.

Fyrri áætlanir viðskiptaráðuneytisins gerðu ráð fyrir 0,1 prósents vexti í einkaneyslu í júní og 0,3 prósent í júlí. Niðurstaðan er því yfir væntingum.

Bloomberg bendir sömuleiðis á að seðlabanki Bandaríkjanna hafi ítrekað sagt að komi fram vísbendingar um verðbólguhjöðnun gætu stýrivextir lækkað. Niðurstöðurnar nú auka líkurnar meir en áður að bankinn lækki stýrivexti á næsta vaxtaákvörðunarfundi sínum í september og koma þannig til móts við þreningar á fasteignalánamarkaði sem kominn er til vegna hárra vaxta sem aukið hefur greiðslubyrði Bandaríkjamanna, að mati Bloomberg.