Birgir komst ekki í gegnum niðurskurðinn

Kylfingurinn Birgir Leifur Hafþórsson mátti í dag sætta sig við að komast ekki í gegnum nðurskurðinn á KLM mótinu í Hollandi. Birgir byrjaði annan hringinn í dag af miklum krafti og var á fjórum höggum undir pari að loknum fimm fyrstu holunum.

Að loknum fimm fyrstu holunum fór að halla undan fæti og Birgir lauk leik í dag á þremur höggum yfir pari og því kominn samtals á fimm högg yfir par. Það dugir honum ekki til að komast í gegnum niðurskurðinn og er Birgir því úr leik.

Birgir lék fyrri níu holurnar í dag á 38 höggum en þær síðari lék hann á 35 höggum. Hann fékk fjóra fugla, 10 pör, tvo skolla og einn þrefaldan skolla. Þá notaðist Birgir við 28 pútt á hringnum í dag en í gær notaðist hann við 26 pútt.

Súrt í broti hjá Birgi Leif en þó eru enn um 10 mót eftir og ekki öll nótt úti enn. Birgir þarf engu að síður að vinna sig töluvert upp peningalistann þar sem hann er núna í 185. sæti. Hann þarf að komast upp í 115. sæti á listanum til að halda fullum keppnisrétti á mótaröðinni.