Samuel Eto´o ætlar ekki að fara fet

Framherjinn Samuel Eto´o segist alls ekki vera að íhuga að fara frá Barcelona í sumar og segist muni fagna því ef Thierry Henry gengi til liðs við félagið. Eto´o segist í samtali við Sky vera með samning við Barcelona og því geti liðið ekki losnað við hann þó það vildi.

"Ég er orðinn leiður á því að svara þessum spurningum. Ég er með samning við Barcelona og hef fulla stjórn á ástandinu. Félagið getur ekki losnað við mig af því ég er með samning og þar sem bæði ég og félagið viljum halda áfram á sömu braut - er tilgangslaust að ræða meira um þetta. Ég ætla að halda áfram hjá Barcelona og ég botna ekkert í því hvaðan þessar sögusagnir koma," sagði framherjinn.

Hann segist þó spenntur fyrir þeim orðrómi að Thierry Henry sé á leið til Barcelona. "Þetta virðist koma upp á hverju ári en það þýðir ekkert að tjá sig um mann eins og Henry fyrr en hann kemur til okkar. Hann er klárlega einn af bestu leikmönnum heims og þeir eru margir fyrir hjá Barcelona. Henry yrði boðinn velkominn hingað af okkur hinum ef hann kæmi," sagði Eto´o.