Birgir Leifur nokkuð öruggur áfram í Andalúsíu

Birgir Leifur Hafþórsson er á þremur höggum undir pari eftir annan keppnisdag á Andalúsíumótinu í golfi á Spáni í dag. Hann er sem stendur í 22. sæti og er öruggur áfram í gegnum niðurskurðinn.

Birgir Leifur lék frábærlega í dag og kom inn á 68 höggum, eða 4 höggum undir pari. Hann lék hringinn í gær á 73 höggum eða einum yfir pari. Birgir var í 79. sæti fyrir hringinn í morgun og hefur því bætt sig um 57. sæti.

Ástralinn Matthew Zions er efstur þeirra sem hafa lokið leik í dag á samtals 9 höggum undir pari, en hann lék hringinn í dag á 70 höggum. Englendingurinn Lee Westwood hefur einnig leikið vel, er á 8 höggum undir pari í dag eftir 16 holur og blandar sér í toppbaráttuna.