Birgir Leifur á höggi yfir pari

Birgir Leifur Hafþórsson lék fyrsta hringinn á Opna Andalúsíumótinu á Spáni í dag á 73 höggum, eða einu höggi yfir pari. Hann lék fyrri níu á 37 höggum og seinni níu á 36 höggum. Hann fékk 3 fugla á hringnum, 12 pör, 2 skolla og einn skramba, sem kom á 7. braut. Hann er sem stendur í 81. - 94. sæti, en margir keppendur eiga eftir að ljúka leik í dag.

Eftir hringinn á morgun verður keppendum fækkað niður í kringum 70 þannig að Birgir þarf að gera betur á morgun til að eiga möguleika á að komast í gegnum niðurskurðinn.

Þetta er áttunda mótið sem Birgir Leifur tekur þátt í Evrópumótaröðinni á þessu keppnistímabili. Hann náði besta árangri sínum á ferlinum um síðustu helgi er hann hafnaði í 11. sæti á Opna ítalska mótinu.

Ástralinn Matthew Zions hefur leikið best þeirra sem hafa lokið leik í dag - á 65 höggum eða 7 höggum undir pari. Svíinn Joakim Haeggman, Englendingurinn Gary Lockerbie og Louis Oosthuizen frá Suður-Kóreu koma næstir á 67 höggum.. Spánverjinn Gonzalo Fdez-Catano, sem sigraði á Opna ítalska mótinu um síðustu helgi, er að leika vel, er á 6 höggum undir pari eftir 15 holur. Daninn Thomas Björn lék á 71 höggi í dag og Spánverjinn Miguel Angel Jiménez var á 72 höggum, eða pari.

Sjáðu skorkort Birgis hér

Frétt af Kylfingur.is