Tveir öflugir á Ístölt 2007

Mikil spenna ríkir fyrir að fá að sjá þá Daníel Jónsson á stóðhestinum fræga Þóroddi frá Þóroddsstöðum og Hinrik Bragason á Skúmi frá Neðri-Svertingsstöðum næsta laugardag þann 31. mars 2007 á Ístöltinu í Skautahöllinni í Laugardal. Þóroddur er búinn að sanna sig á kynbóta-og keppnisbrautinni. Hann hefur unnið fjölda sigra og er með 8,28 fyrir sköpulag og einkunnina 9,04 fyrir hæfileika.

Daníel vann Ísmót Austurlands á Þóroddi ásamt Hinriki Bragasyni á Skúmi frá Neðri-Svertingsstöðum fyrir stuttu. Hinrik er heimsfrægur knapi sem hefur hampað flestum titlum í íslenska hestaheiminum og Skúmur er í fanta formi. Nú kemur til uppgjörs þessara öflugu knapa en þeir deildu fyrsta sætinu á Ístölti austurlands. Það verður afar spennandi að fá að sjá báða þessa keppniskappa takast á aftur á sínum stórkostlegum gæðingum.