Woods vann í Miami í sjötta sinn

Tiger Woods sigraði á CA-heimsmótinu í golfi í gær þrátt fyrir að hafa spilað illa á lokadeginum og klárað hringinn á einu höggi yfir pari. Fjögurra högga forskot kappans fyrir lokadaginn gerði það hins vegar að verkum að aðrir kylfingar náðu ekki að ná efsta sætinu af honum.

Woods var í vandræðum með stutta spilið í Miami í gær og missti nokkur pútt sem fyrirfram höfðu talist afar auðveld. Brett Wetterich gerði harða atlögu að Woods um tíma en varð að sætta sig við annað sætið að lokum eftir að hafa leikið hringana fjóra á alls 8 höggum undir pari, tveimur höggum meira en Woods.

Þetta var í sjötta sinn sem Woods sigrar á CA mótinu og hans 56. sigur í PGA-mótaröðinni frá upphafi.

“Aðstæður í dag gerðu mér erfitt fyrir og slæmt gengi mitt reyndi á þolinmæðina. Vindurinn var erfiður og ég átti erfitt með að átta mig á stefnu boltans. Sem betur fer hafðist þetta þó,” sagði Woods eftir að hafa tekið á móti sigurlaunum sínum.