Roberto Carlos hættir með Real Madríd í vor

Brasilíski knattspyrnumaðurnn Roberto Carlos hyggst hætta að leika með spænska liðinu Real Madrid í vor eftir ellefu ára dvöl hjá konungsliðinu. Þetta kemur fram í viðtali við hann í spænska íþróttadagblaðinu Marca í dag.

Samningur Carlosar rennur út í sumar og hyggst hann ekki endurnýja hann enda kominn á seinni hluta ferils síns, 33 ára gamall. Gengi Real Madríd hefur sitt að segja því haft er eftir Carlos að hann hafi þurft að taka þessa ákvörðun eftir þrjú ár í röð án nokkurra titla, en Real Madríd er eitt sigursælasta lið Evrópu og þar á bæ telst knattspynutímabilið lélegt ef enginn titill vinnst.

Roberto Carlos gekk til liðs við Real Madrid árið 1996 frá ítalska liðinu Inter og hefur síðan unnið þrjá Evrópumeistaratitla og tvo meistaratitla á Spáni með félaginu auk tveggja heimsmeistaratitla með brasilíska landsliðinu. Carlos hefur spilað fleiri leiki fyrir Real Madríd en nokkur annar erlendur leikmaður og skorað 45 mörk fyrir félagið.