Staðgengill óskast til flengingar

Kínverskur kaupsýslumaður hefur auglýst eftir ungri konu sem er til í að láta flengja sig, gegn greiðslu. Kínverskir fjölmiðlar segja að eiginkona mannsins hafi reiðst mjög þegar hún komst að því að hann átti ástkonu. Hún krafðist þess að fá að flengja ástkonuna, að öðrum kosti myndi hún skilja við manninn.

Maðurinn vildi ekki skilja, en vildi heldur ekki leggja ástkonu sína undir flengingu. Hann greip því til þess ráðs að auglýsa á vinsælli net-atvinnumiðlun (sina.com) eftir konu sem væri til í að láta flengja sig í hennar stað. Yfir tíu konur sóttu um þessa vinnu. Maðurinn hefur nú valið einn umsækjandann, 35 ára gamla konu, sem fær sem svarar 25 þúsund krónum fyrir hverjar tíu mínútur sem hún er flengd.