Reyes gagnrýnir Capello

Jose Antonio Reyes hefur nú fetað í fótspor félaga síns Robinho hjá Real Madrid með því að væla yfir vinnuaðferðum þjálfara síns í fjölmiðlum. Reyes er lánsmaður frá Arsenal og í gær sagðist hann hvorki skilja upp né niður í vinnubrögðum þjálfara síns.

"Strákarnir í liðinu eru ringlaðir, því þjálfarinn er alltaf að hringla með stöðurnar okkar og láta okkur spila stöður sem við erum ekki vanir. Það truflar ekki aðeins mig, heldur einnig menn eins og Robinho og Guti," sagði Reyes í samtali við Marca. Hann er enn ósáttur við að fá ekki að spila meira og gagnrýndi einnig leikaðferðir þjálfara síns.

"Ég hitaði upp í 45 mínútur gegn Bayern en fékk ekki að spila neitt. Ég hef ekki hugmynd um hvað ég þarf að gera til að fá að spila og ég er fúll því mig langaði virkilega að spila þennan leik. Við vorum að spila of mikinn varnarleik gegn Bayern og þjálfarinn lætur okkur liggja of aftarlega á vellinum. Við erum Real Madrid - við eigum að sækja," sagði Reyes, sem væntanlega kemur sér ekki frekar í náðina hjá þjálfara sínum með þessum ummælum sínum.