Hugo Viana: Ronaldo fer til Spánar í sumar

Portúgalski miðjumaðurinn Hugo Viana hjá Valencia fullyrðir að landi hans Cristiano Ronaldo hjá Manchester United muni ganga í raðir Barcelona eða Real Madrid í sumar.

"Cristiano er einn af þremur bestu knattspyrnumönnum í heiminum í dag ásamt Ronaldinho og Deco hjá Barcelona. Hann hefur lagt hart að sér til að komast þangað sem hann er í dag og það verður mjög erfitt fyrir Manchester United að halda honum.

Ef Barcelona eða Real hafa virkilegan áhuga á honum, munu þau gera það. Hann á ekki mikið eftir á Englandi og það hentar honum miklu betur að spila á Spáni. Ég reyndi að spyrja hann út í þetta í síðustu viku en hann sagði ekkert - enda er Ronaldo ekki vanur að tjá sig mikið um sín mál," sagði Viana, sem áður lék með Newcastle á Englandi en náði sér aldrei á strik þar.