Beckham gæti spilað fyrir Real

Fabio Capello, þjálfari Real Madrid, hefur dregið úr þeim ummælum sem hann lét falla fyrir nokkrum vikum um að David Beckham myndi ekki spila aftur fyrir félagið þar sem hann hefur samið við LA Galaxy í Bandaríkjunum. Capello segir nú að ef Beckham sé í góðu formi og sýni rétt viðhorf eigi hann möguleika á að komast í liðið.

"Ég á enga vini né óvini í mínum leikmannahóp. Ég vel einfaldlega þá leikmenn í liðið sem ég treysti best á því augnabliki. Eins og við á um alla leikmenn veltur ákvörðun mín að miklu leyti á líkamlegu ásigkomulagi þeirra. Ég get ekki valið Beckham núna þar sem hann á við hnémeiðsli að stríða," sagði Capello, sem var spurður hvort að hann hefði gert mistök með því að fullyrða að Beckham fengi aldrei að spila aftur fyrir Real.

"Fólk getur gert mistök en þessi ákvörðun á sínum tíma var tekin af öllu þjálfarateyminu," svaraði Capello en það teymi telur þrjá menn, þar af Capello sjálfan.

"Þegar ég sé að hann er í góðu formi og sýnir rétt viðhorf þá gæti hann orðið hluti að liðinu á ný. En hann verður að sýna mér að hann er tilbúinn að leggja það á sig," bætti Capello við.